डॉ . अमोल कोल्हेचा दमदार विक्रम!

मंत्र , संख्या , गाणं यांना वगळून तब्बल ८५ शब्दांची कविता एका श्वासात म्हणण्याचा पराक्रम डॉ . अमोल कोल्हेने केला आहे . २४ सेकंदाच्या या ' ब्रेथलेस ' अभिवाचनाची नोंद थेट ' लिम्का बुक ' ने घेतलीय . या विक्रमी वाचनाचं मराठीतलं पहिलं ब्रेथलेस गाणं गायलं आहे ते बेला शेंडे हिने .

नवनव्या विक्रमासाठी ' लिम्का बुक ऑफ वर्ल्ड रेकॉर्ड ' वाल्यांकडे सतत बोलावणी येत असतात . पण , मराठीत सुरू असलेल्या एका तयारीची कल्पनाच त्या लोकांना नव्हती . एखाद्या कवितेचं अभिवाचन एका दमात होऊ शकतं याचा विचारच ' लिम्का ' वाल्यांनी केला नव्हता . म्हणूनच महाराष्ट्रातून ' अशा ' आगळ्या रेकॉर्डबद्दल माहिती मिळाल्यावर त्यांचे डोळे विस्फारले . प्राजक्ता गव्हाणेने लिहिलेल्या दीर्घकाव्याचं एका दमात वाचन करून डॉ . अमोल कोल्हेने विक्रम साकारला होता . विशेष म्हणजे लिम्का बुकमध्ये होणारी अभिवाचन विक्रमाची ही पहिलीच नोंद ठरली आहे .

गेल्या मार्च - एप्रिलपासून या प्रोजेक्टची तयारी प्राजक्ता गव्हाणे , शंकर जांभळकर , तेजस चव्हाण आणि अमोल करत होते . याबद्दल बोलताना अमोल म्हणाला , ' कविता अभिवाचनाचा हा प्रकार मला नवीन होता . या तीन मुलांनी मला ' ब्रेथलेस ' अभिवाचनाची कल्पना सांगितली आणि मी उडालोच . कारण वाचन करताना तुमच्या श्वासाची कसोटी लागते . पण , आव्हान म्हणून मी ते स्वीकारलं . एक महिन्याच्या तालमीनंतर रेकॉर्डिंग ठरलं .' बाकीची शुटिंग्ज सांभाळत अमोलने तयारी सुरू केली आणि एक दिवस ठिय्या मारून तो तालमीला बसला . ' रेकॉर्ड करणं माझा उद्देश नव्हता . पण , ८५ शब्द एका दमात उच्चारणं . शिवाय त्याचा अर्थ लोकांपर्यंत पोहोचणं महत्त्वाचं होतं . त्यामुळे वाक्याचे चढउतार , पॉज हे असणार होतेच . असं करून मला ती कविता नीट वाचायला २४ सेकंद लागले ,' अशी माहितीही अमोलने दिली .

' मे महिन्यात या अभिवाचनाचं रीतसर शूट झालं . दोन गॅझेटेड ऑफिसर्सनी ते प्रमाणित केल्यावर आम्ही रेकॉर्डिंग ' लिम्का ' कडे पाठवलं . २०१३च्या त्यांच्या आवृत्तीत त्याची दाखल घेतली जाईल ,' असं सांगतानाच तेजस , शंकर , प्राजक्तामुळेच हा विक्रम झाल्याचं अमोलने आवर्जून सांगितलं .

बेलाही ब्रेथलेस !

अमोलच्या ब्रेथलेस अभिवाचनाला चार चांद लागले आहेत ते बेला शेंडेच्या ब्रेथलेस गायनाने . ' युनिव्हर्सल म्युझिक ' च्या ' कण्हेरीची फुले ' या अल्बममध्ये हे अभिवाचन आणि बेलाचं गाणं ऐकता येईल . हे गाणं तीन मिनिटांचं असून , मराठीतला हा पहिलाच प्रयोग असल्याचं बेला सांगते . ' ही तीनही मुलं कष्टाळू आहेत . त्यांनी माझ्याकडे हे प्रपोजल आणलं त्यावेळी मी एकूण कामाबद्दल साशंक होते . पण गीत , चाल फारच छान होती . सोमवारी हा अल्बम लोकांच्या भेटीला येईल , ' असंही तिने सांगितलं . तिच्यासह सुरेश वाडकर , प्रसेनजीत कोसंबी यांनीही या अल्बममध्ये गाणी गायली आहेत . 
watch full artical link - http://maharashtratimes.indiatimes.com/articlelist/2429541.cms